قصہ ایک بڑے مُلک کا

مگر اس بات کا کیا کِیا جائے کہ 14 اگست کو محض جشنِ آزادی نہیں منایا جاتا، اس ملک کے لیے جان دینے والوں کو بھی یاد کیا جاتا ہے، 16 دسمبر کو ڈوبتے سورج کے ساتھ دل بھی ڈوب جاتا ہے، 1947 سے لے کر آج تک اس مُلک کی حفاظت کی خاطر جان دینے والے جیالوں نے “واہگہ” کی “لکیر” کو اتنا گہرا کر دیا ہے کہ اس کا مٹنا ناممکن ہے۔

ایک دفعہ کا ذکر ہے کہ ایک خطے کی تقسیم سے دو ملک وجود میں آئے، ایک ملک رقبے میں بڑا تھا جبکہ دوسرا چھوٹا۔ ہر چند کہ بڑا مُلک نہیں چاہتا تھا کہ یہ خطہ تقسیم ہو اور “چھوٹا مُلک” بنے، مگر جب چھوٹا ملک بن ہی گیا تو بڑے مُلک نے “کُھلے دِل” سے چھوٹے مُلک کو قبول کر لیا اور اس کی ترقی کے لیے تبھی سے کوششیں شروع کر دیں، مثلاً اس وقت کے “لارڈ” سے مل کر بہت سے مسلم اکثریتی علاقے “بڑے ملک” میں شامل کرا لیے، جن کا مقصد چھوٹے ملک کو نقصان پہنچانا ہر گز نہیں تھا بلکہ بڑے مُلک کو یہ فکر تھی کہ چھوٹا مُلک یہ علاقے سنبھال بھی سکے گا یا نہیں؟ بالکل اسی طرح جن ریاستوں کو اختیار حاصل تھا کہ بڑے ملک کے ساتھ الحاق کریں یا چھوٹے مُلک کے ساتھ، ان پر بھی فوج کشی کر کے قبضہ کر لیا گیا، وجہ وہی جو اوپر بیان کی گئی ہے۔

سنہ1947ء میں ہندو اکثریتی علاقوں سے ہجرت کرنے والے لاکھوں مسلمانوں کو شہید کر دیا گیا، وجہ بڑے ملک کی نیک نیتی کہی جا سکتی ہے، کیونکہ اگر اتنی تعداد میں مہاجر نوزائیدہ چھوٹے مُلک میں براجمان ہوتے تو چھوٹے ملک کا کیا بنتا؟

یہی نہیں بڑا مُلک چاہتا تھا کہ چھوٹا مُلک کسی کا دست نگر نہ رہے بلکہ سب کچھ اپنے زورِبازو سے حاصل کرے، یہی وجہ ہے کہ وسائل کی تقسیم بھی منصفانہ نہیں کی گئی۔ انڈین ریزرو بنک سے جو رقم چھوٹے ملک کو ملنا تھی اسے دینے میں بھی لیت ولعل سے کام لیا گیا، حتیٰ کہ ان کے “مہاتما” کو مرن برت رکھںا پڑا اور جیسے تیسے کر کے رقم ادا کی گئی۔ اور چونکہ بڑے ملک کے کوئی جارحانہ عزائم بھی نہ تھے چھوٹے مُلک کے خلاف، یہی وجہ ہے کہ جو اسلحہ چھوٹے مُلک کے حصے میں آنا تھا ان بکسوں میں بھی اسلحہ نہیں تھا۔ یہاں سے بڑے ملک کی دیانتداری کا اندازہ لگایا جا سکتا ہے، یعنی اگر وہ چاہتا تھا کہ اسلحہ نہ دیا جائے تو یہ بھی ہو سکتا تھا کہ وہ بکسے بھی نہ بجھواتا مگر اس نے ایسا نہ کیا، ہونے کو یہ بھی ہو سکتا تھا کہ وہ بکسے آ ہی گئے تھے تو خالی ہوتے مگر یہ بھی نہ ہوا کیونکہ ان بکسوں میں گھاس پھوس، نرسوں کے گاؤن اور زائد المدت ادویات تھیں، یقیناً چھوٹے ملک کے کام آئی ہوں گی۔ بعد کی جو جنگیں ہوئیں ان کی توجیہ یہ بیان کی جا سکتی ہے کہ بڑے ملک کو غیب کا علم نہ تھا، ورنہ ممکن تھا کہ وہ اپنے حصے کا جنگی ساز وسامان چھوٹے ملک کے سپرد کر دیتا۔

چونکہ چھوٹا مُلک بڑے مُلک کے “نیک ارادوں” سے ناواقف تھا لہٰذا اس نے کشمیر پر بڑے ملک کی فوج کشی پر احتجاج کیا، حالانکہ مہاتما بتا چکے تھے کہ یہ ان کے بزرگوں کا علاقہ ہے اور اس سے انہیں بے حد محبت ہے۔ مگر چونکہ انہوں نے یہ نہیں بتایا تھا کہ جونا گڑھ، گورداسپور، مناوادر، گوا اور حیدر آباد سے ان کے اُنس کی وجہ کیا ہے؟ یہی بات ہے جو غلط فہمی کی وجہ بنی، حالانکہ یہ بھی فرض کیا جا سکتا تھا کہ اگر ان علاقوں میں ان کے بڑے نہیں تو شاید بچوں میں سے کوئی جا بسے اور وجہ الفت بن جائے۔ مگر چھوٹے ملک کے رضا کار، مجاہدین اور فوج نے کشمیر کو آزاد کرانے کی کوشش کی تو بڑے ملک نے “امن پسندی” کا ثبوت دیتے ہوئے اقوامِ متحدہ کا رخ کیا اور استصوابِ رائے کا وعدہ کیا، مگر بوجوہ بڑے ملک کو اپنے وعدے سے مکرنا پڑا۔ وجہ؟ اب ہر بات کی وجہ بتائی جائے آپ کو؟

چھوٹے مُلک کو آنے والے دریاؤں کے ہیڈ ورکس بڑے ملک میں تھے، لہٰذا اس امر کا فائدہ اٹھاتے ہوئے بڑے مُلک کا جب جی چاہتا پانی چھوڑ کر سیلاب کا ریلا چھوڑ دیتا اور جب جی چاہتا چھوٹے مُلک کو “سوکھا” بٹھا دیتا، وجہ یہ تھی کہ چھوٹا ملک ہر قسم کے حالات کے لیے تیار رہے اور پھر چاہے آندھی آئے یا سیلاب، طوفان آئے یا قحط، چھوٹا ملک سخت جان ہو جائے اور کوئی اس کا کچھ نہ بگاڑ سکے۔ مگر چھوٹے مُلک نے اس پر بھی احتجاج کیا تو دوسرے ملکوں کے سمجھانے پر بڑے مُلک نے ۳ دریاؤں پر چھوٹے ملک کا حق تسلیم کر لیا۔ اس طرح ۳ دریا بڑے ملک کے ہو گئے اور باقی تین پر اس نے ڈیم بنا لیے تا کہ چھوٹے مُلک کو سخت جان بنایا جا سکے۔

چونکہ بڑا مُلک ہمیشہ چھوٹے مُلک کی بھلائی چاہتا تھا، یہی وجہ ہے کہ اسے سنہ1965ء کی جنگ کرنا پڑی تاکہ جو ہتھیار چھوٹے مُلک نے حاصل کیے تھے ان کو جانچا جا سکے کہ کہیں چھوٹے مُلک نے دھوکا تو نہیں کھا لیا، چھوٹا تو پھر چھوٹا ہی ہوتا ہے۔ جب بڑے ملک کی تسلی ہو گئی تو اس نے پھر سے اقوام متحدہ کا دروازہ کھٹکھٹایا تاکہ جنگ بندی ہو سکے۔

سنہ1971ء کی جنگ میں بھی بڑے مُلک کے کردار پر شک نہ کرنا چاہیے، اس نے تو بنگلہ دیش کو بننے سے بہت منع کیا مگر وہ بن ہی گیا تو کسی کا کیا قصور؟ ویسے بھی اگر بنگلہ دیش نہ بنتا تو شیخ حسینہ واجد کہاں جاتیں؟ وہاں کی عدالتیں کسے سزائے موت دیتیں؟ جج تنخواہ کس بات کی لیتے؟

چونکہ بڑا مُلک عدل وانصاف کے معاملے میں بہت فعال ہے، یہی وجہ ہے کہ افضل گورو جیسے نوجوانوں کو پھانسی دے دیتا ہے جبکہ مودی صاحب صاف بچ نکلتے ہیں، مگر خیر۔

چونکہ بڑے مُلک کو اپنے ہمسایوں کا بہت خیال ہے لہٰذا وہ سری لنکا میں اپنے خدمت گزار بھیجتا رہا، اور چھوٹے ملک کے “پسماندہ صوبے” کے عوام کا بھی اسے بہت خیال ہے یہی وجہ ہے کہ وہ “خاموشی” سے اس صوبے کے کچھ لوگوں کی ہتھیاروں اور ڈالروں سے مدد کرتا ہے، کھلے عام اس لیے نہیں کرتا کیونکہ اسے لوگوں کی عزتِ نفس کا بہت خیال ہے۔

بڑے مُلک کی امن پسندی کا یہ عالم ہے کہ اپنے تمام ہمسایوں کے ساتھ اس کے “جنگ بندی” معاہدے ہو چکے ہیں، جن کے ساتھ نہیں ہوئے وہ بڑے مُلک کے “باجگزار” ہیں۔ اوہ معاف کیجیے گا۔

تقسیم کے بعد اتنے سال گزرنے کے باوجود بڑے مُلک کی “محبت” کا عالم وہی ہے جو تقسیم کے وقت تھا، یہی وجہ ہے کہ اس کے ڈراموں اور فلموں اور میڈیا میں بھی چھوٹے ملک کا شد ومد سے ذکر ملتا ہے، حتٰی کہ وہاں کی پارلیمنٹ بھی چھوٹے ملک کا ذکر بہت “اچھے” الفاظ میں کرتی ہے۔ اگر ذکر کا کوئی بہانہ نہ ملے تو اپنی ہی ایجنسیوں کے ذریعے کوئی بڑا کارنامہ کروا کے اس کا سہرا زبردستی چھوٹے مُلک کے سر باندھ دیا جاتا ہے اور عرصہ تک چھوٹے مُلک کے گُن گائے جاتے ہیں، اس کی ایک بہت بڑی وجہ بڑے ملک کی دریا دلی ہے۔

بڑے ملک کی دریا دلی کے گُن گانے والوں کی چھوٹے مُلک میں بھی کمی نہیں جسے چھوٹے مُلک کی خوش قسمتی ہی کہا جا سکتا ہے، یہ “گُن گانے والے” امن کی آشا کے بہت بڑے طرف دار ہیں۔ جب بڑا مُلک کہتا ہے کہ واہگہ کی لکیر نہیں ہونی چاہیے تو یہ جھٹ ہاں میں ہاں ملا دیتے ہیں، جن کا اول آخر استفسار یہ ہے کہ آخر چھوٹا مُلک بنا کیوں اور اگر بن ہی گیا تھا تو اسلامی جمہوریہ کیوں بنا، سیکولر کیوں نہ بنا، اگر بنتا تو سیکولر بنتا اور اگر سیکولر بنتا تو بنتا ہی کیوں، بڑا ملک بھی سیکولر ہی تھا، وہ کیا برا تھا؟

کچھ اور لوگ بھی ہیں جو امن کی آشا سے تعلق تو نہیں رکھتے مگر یہ ضرور چاہتے ہیں کہ واہگہ بارڈر24گھنٹے کھلا رہے، ویزہ فری بر صغیر بن جائے۔ اور یہی نہیں بلکہ کچھ تو یہ چاہتے ہیں کہ مشترکہ ایٹمی گھر بنایا جائے، اگر وہ چاہیں تو یہ بھی کہہ سکتے ہیں کہ مشترکہ وزیر اعظم بنا لیا جائے، مشترکہ ایٹم بم بنا لیا جائے، مشترکہ فوج بنا لی جائے، مشترکہ سپہ سالار بنا لیا جائے، مگر چونکہ وہ ایسا نہیں کہتے اس لیے اس بات پر بھی ان کا شکریہ ادا کیا جانا چاہیے۔

 الغرض بڑے مُلک کی خدمات بے شمار ہیں جن کا سراہا جانا بے حد ضروری ہے، مگر اس بات کا کیا کِیا جائے کہ14اگست کو محض جشنِ آزادی نہیں منایا جاتا، اس ملک کے لیے جان دینے والوں کو بھی یاد کیا جاتا ہے، 16  دسمبر کو ڈوبتے سورج کے ساتھ دل بھی ڈوب جاتا ہے، 1947 سے لے کر آج تک اس مُلک کی حفاظت کی خاطر جان دینے والے جیالوں نے “واہگہ” کی “لکیر” کو اتنا گہرا کر دیا ہے کہ اس کا مٹنا ناممکن ہے۔ اس مُلک کی اساس پریہ کہتے ہوئے جتنا بھی شک کیا جائے کہ قائد اعظم پروپیگنڈسٹ تھے، بڑا مُلک مجھے پسند نہیں آ سکتا کیونکہ آخرکار میں ایک پاکستانی ہوں۔